BOSASO::Ato Meles Zenawi Asres Hogaamiyaha Dalka Itoobiya wuxu dhashay Sideedii Bishii Shanaad Sanadkii 1955 Wuxuna ku Dhashay Magaalada Adwa ee Gobolka Tigree, inkastoo Caan ku yahay Meles hadana magaciisa dhabta ahi ee hore waa Legesse, Magaca Meles waxa loo bixyey xiligiii uu Jabhadka ahaa inkastoo intii dambe uu Shahadooyinkiisa ku qortay Meles.

Wuxu Dugsiga H/Dhexe  kabilaabay kuna Dhamaystay Dugsigii la odhan Jiray Queen Of Sheba Junior Secondary school, Sanadkii 1972 ayuu Dugsiga sare ka dhamaystay General Wingate oo Addis ku yaaly, kadibna wuxu galay Kuliyada Caafimaadka Jaamacdii Xayle Salaase,

Balse Labo sano markuu dhiganayey Zenawi ayuu kabaxay Jaamacada, sanadkii 1974 ayuuna ku biiray Jabhadii Tigreega ee la odhan jiray Tigrai Peoples Liberation Front (TPLF).

1979 ayaa loo doortay inuu Hogaamiyo Guddiga Hogaanka sare ee Jabhada, Afarsano Kadib 1983-gii ayaana loo doortay Hogaamiyaha Guddida Joogtada ah.

Sanadkii 1989 ayuu noqday Hogaamiyaha Jabhada TPLF iyo Hogaamiyaha Xisbiga Ethiopia Peoples Revolutionary Democratic Front (EPRDF)

Kadib Guushii Jabhaduhu ka gaadhayn Xukunkii Militariga ee Migiste wuxu Meles Zenawi Noqday Madaxweynaha Dowlada kumeelgaadhka ee Itoobiya  iyo Gudoomiyaha Golaha Wakiilada xiliigaas isagoo Xilkaas hayey 1991-1995.

Sanadkii 1995 ayuu u tartamay Xilka Raysal Wasaaraha Wuuna ku guulaystay Xilkaas isagoo Noqday Raysal Wasarihi ugu horeyey ee Itoobiya yeelato.

Intii uu Xilka Kumeelgaadhka u hayey Meles Zenawi waxa soo maray Go'aamo Taariikhda galay oo ay ka mid ahayd Goosashadii Gobolka Eriteriya uu ka Go'ay Itoobiya inteeda kale oo ka dhigtay Wadanka Itoobiya mid bad-ahaan Go'doonsan, wuxu badalay Nidaamkii hore ugu degsanaa Dalka Itoobiya isagoo ka dhigay Wadan Federal ah oo Gobolada la siiyey Ismaamul Hoosaad u gaar ah.

Sanadkii 1995 Doorashadiisa kadib ayuu Raysal Wasaare Melez noqday Gudoomiyaha Ururkii Afrika ee Organization of Afrikan Union wuxuna Xilka ka degay Sanadkii 1996, wuxu isla sanadka noqday Hogaamiyaha labaad ee Ururkii la odhan jiray Global Coalition for Africa, wuxuna ku biiray Uru Goboleedka IGAD oo uu ka mid ahaa Xubnaha Asaasay sanadkaas.

Sanadkii 1998 ayuu Meles Dagaal Qadhaadh la galay Dowlada ka Go'day ee Eriterya Dagaalkaas oo Socday Muddo labo sano ah wuxu keenay Khasaare Nafeed iyo Mid Maalba iyadoo Ciidamada Itoobiya la sheego in ay si weyn ugu madhayn dagaalkaas inkastoo ay gudaha u galayn dalka Eriteriya, wuxuna Dagaalkaas Siiyey Eriteriya Maqaam ay kula tartanto Itoobiya go'aan ka gaadhista Xaaladaha iyo Siyaasadaha Gobolka Geeska Afrika.

Sanadkii 2000 ayuu markale isku taagay Doorashada Madaxtinimada Dalka Itoobiya isagoo si fudud ugu guulaystay inuu xilka hayo Xili labaad.

Wuxu markale Isku taagay Doorashada Sanadkii 2005, balse wakhtiga waxa hadheeyey Rabshado lagaga soo horjeedo kadib markii la sheegay inuu ku guulaystay Doorashada waxana Dhaleecayn Caalami ah uu kala kulmay Sidii loo maareyey Banaanbax lagaga soo horjeedo Natiijada Doorashada oo 15 Bishi Shanaad Sanadkii 2005 ka dhacay Addis Ababa oo ay ku dhintayn dad Aad u tiro badan.

Meles Zenawi oo ku dhuumanaya inuu taageerayo Dowladii Cabdilahi Yuusuf Axmed wuxu hirgaliyey Siyaasad Boqolaal Sano soo taxnayd oo ahayd Sidii Itoobiya gacanta ugu dhigi lahayd Somaliya, wuxuna sanadkii 2006 Ciidamadiisu gudaha u galayn Dalka Somaliya iyagoo xoog ku muquuniyey Midowgii Maxaakiimta,

Inkastoo Zenawi Qabsasho Ahaan ku guulaystay inuu Gudaha u galo Somaliya hadana wuxu kooxii islaamiyinta kala kulmay Cadaadis Badan kaas oo aakhirkii ku kaliftay inuu Ciidamadiisa kala Baxo Somaliya Labo Sano kadib.

Inkastoo ilaa hadaaya Dowlada Itoobiya Qariso Ciidamada Kaga Dhintay Gudaha dalka Somaliya iyo Miisaaniyada kaga baxdayba hadana Melez oo Saxaafada Mar ugu Waramayey Addis Ababa wuxu sheegay inay Dhaqaalo badan oo aanay xamilayn kaga baxay Somaliya ujeedadii ay laahayeena ay gaadhayn taasina keentay inuu Ciidamadiisa kalasoo baxo dalka Somaliya.

 Meles Zenawi sidii Hogaamiyihi ka horeeyey oo kale wuxu yeeshay Mucaarad Hubaysan oo kasoo horjeeda Xukunka dalka itoobiya, waxa Gobolka Ismaamulka Somalida Itoobiya ka jira Jabhad Hubaysan oo dagaal kula jirta Itoobiya sidii ay u xorayn lahayd Gobolka Jabhadaas oo la yidhaahdo ONLF.

Gobolka Oromada isagana waxa ka jira Jabhad la mid ah ta hore oo iyaduna u dagaalanta Xoraynta Gobolka Oromiya Jabhadas oo la yidhaahdo OLF.

Dhinaca Xuduudka Eriteriya waxa la sheega inay ka jirto Jabhad aan xooganayn oo taageero ka hesha Eriteriya Jabhadaas oo ah tu Canfarta u dagaalanta.

Itoobiya si ay Cadaadiso Eriteriya iyo Wadanka Suudaan oo u muuqda mid awood ahaan kula tartamaya Gobolka Bariga Afrika waxay Itoobiya xidhiidh fiican la samaysay Jabuuti, Somaliland, Puntland iyo Kenya, iyadoo lagu tiro Somaliland iyo Puntland inay yihin kuway xidhiidhka ugu wanagsan la leedahay.

Meles dhinaca Waxbarashada inkastoo uu Jaamacada ka tagay 1974 hadana muu noqon nin ka maqnaada Waxbarashada wuxu sanadkii 1995 Shahaadaada Masterka ee Business Administration ka qaatay Jaamacada Open University of United Kingdom, isla Sanadkii 2002 wuxu Shaahadada Sare ee Doctoral Degree of Political Science ka qaatay Jaamacada Hannam University ee Dalka Koonfurta Kuuriya, 

Labo sano kadibna Sanadkii 2004 wuxu Shaahadada  Master ee Dhaqaalaha ka qaatay Jaamacada Erasmus University ee dalka Holland Ama Netherlands qofba siduu u yaqaan

Raysal Wasaare Meles waa aabo leh seddex caruur ah wuxuna qabaa gabadh caan ka ah Itoobiya oo la yidhaahdo Azeb Mesfin, oo ka tirsan Barlamaanka Itoobiya, waxay caan ku tahay u ololeenta Xuquuqda Haweenka, waana gabadh ganacsato ah.

Ato Meles Zenawi waxa lagu tirayaa Hogaamiyayaasha Afrika ee leh Hobbies ay jecel yihin, waxana la sheega in wakhtiga Firaaqada uu leeyahay uu ku qaato Akhriska, Dabaasha iyo Ciyaarta Tenniska loo yaqaan.

Caqiido ahaan Meles waa Masiixi aaminsan Mad-habta Orthodox-ka.

HADAAFTIMO MEDIA CENTRE

Comments

Add New Search

bbbbbbbbbbbbbbbbbb  - bbbbbbbbbbbbbbbbbbbbbbbb   |2009-11-02 05:30:30 gaal weyn iga dheh

Write comment
Name:
Email:	do not notifynotify
Title:

Powered by !JoomlaComment 3.26

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."