Muqdisho::-Taliyaha ciidanka AMISOM Major-General Nathan Mugisha ayaa sheegay in ay ka ceyrin karaan Muqdisho kooxaha ka soo horjeeda DFKM hadii ay helaaan ciidamo dheeri ah oo ku filan kuwaas oo ka socda Midowga Afrika.

Major-General Nathan yaa sheegay in ciidamada AMISOM ay caqabado ka noqotay in ay talaabo qaadaan maadaama aysan heysan Mandheyd iyo tiro ciidan oo ku filan sidaa darteedna ay sugaan amaanka madaxada sare ee DFKM iyo dekkada iyo Madaarka Aden Cadde.

General Nathan ayaa waxaa uu sheegay in dalalka Afrika ay ka sugayeen ciidan gaaraya ilaa  8,000 oo askari laakiin ay hadda heystaan oo kaliya 5,400 askari kuwaas oo aan ku filnayn in ay hantaan amaanka magaalada Muqdisho .

Mr.Nathan ayaa waxaa uu wacad ku maray in kooxaha Al-Shabaab iyo Xisbul Islaam ay ka saarayaan Muqdisho ayna ka awood badan yihiin hadii ay helaan tirada ciidamada dhiman iyo taageero beesha Caalamka.

“Markii dhowaan Al Shabaab ay qarxisay fariisinka AMISOM ee Xalane bishii September, waxay ka bexeen guud ahaa meelihii ay ka joogeen Muqdisho, waxayna tageen bannaanka Muqdisho iyagoo ka baqaya in AMISOM ay ka aargoosato”, ayuu yiri General Nathan Mugisha.

General Nathan Mugisha ayaa ku faanay  inay jiraan guulo ay ciidanka AMISOM ka gaareen hawlihii loo diray oo ay ka mid ahayd sugida amaanka xarumaha DFKM iyo madaxdooda .

Mar wax laga weydiiyey Madaafiicada ay ciidanka AMISOM la dhacaan Shacabka ayaa waxaa uu yiri “Shaqadeenu ma ahan inaan wax duqeyno, laakiin waa inaan abuurno jawi wada hadal oo la isugu iman karo xalka Soomaaliya waa mid siyaasadeed ee ma ah wax kale ”,

Dagaalka ay wadaan kooxaha ka soo horjeeda Ciidanka AMISOM iyo kuwa DFKM ayuu wuxuu ku tilmaamay mid ah ku dhufo oo ka dhaqaaq ah waxaana uu qiray taliyaha AMISOM in inta badan Degmooyinka Muqdisho ay heystaan kooxaha ka soo horjeeda DFKM.