Wasiirka Wasaaradda Dib u heshiisiinta C/rashiid Xaaji Deerow oo ka mid ah wafdiga booqashada ku jooga dalka Rwanda ayaa sheegay inay kulamo la yeesheen madax ka tirsan Dowladda, gaar ahaan Wasaaradaha Dib u heshiisiinta, Nabadda iyo dib u heshiisiinta dalkaas.

"Anagoo u kuur galeynay waaya aragnimada ay dadka Rwanda uga gudbeen dagaaladii ahlga ahaa ee ka jiray sanadkii 1994-kii ayaa waxaan kulamo la yeelanay qeybaha arrimahaas ku shaqada leh" ayuu yiri Wasiirka oo sheegay in dadka Rwanda ay doorteen nabad iyo horumar sidii uu ku gaari lahaa dalkooda.

Dhinaca kale Wasiirka dib u heshiisiinta Dowladda KMG ah Md. C/rashiid Deerow waxa uu sheegay inay sidoo kale tageen Wasaaradda arrimaha dibadda Rwanda, halkaasi oo uu sheegay Wasiirku in sidoo kale ay ka heleen macluumaad la xiriira qaabka wadankaasi ugu tallaabsaday nabadda iyo horumarka, isla markaasina ay uga hortageen dagaaladii ka jiray.

"Waxaan ka xumahay dagaalada sii soconaya qofkii nabadda iyadoo u hiilineysa dhib ka soo gaaro dhibaato ayay u tahay shacabka Soomaaliyeed" ayuu yiri C/rashiid Xaaji oo ugu baaqay dadka Soomaaliyeed inay ku daydaan shacabka Rwanda, isla markaasina wixii dhacay laga gudbo oo loo wada jeesto nabadda iyo horumarka ay gaareen dalalka Afrika ee colaadaha iyo fowdada la degtay, balse ka soo kabsaday.